Slik er organiseringa av karriererettleiing for flyktningar
Karriererettleiing for flyktningar er organisert som eit samarbeid mellom kommune og fylkeskommune. Ordninga skal sikre god kompetansekartlegging og målretta rettleiing som støttar deltakarane i val av arbeid og utdanning.
Sist oppdatert : 5. mars 2026Nykomne flyktningar og innvandrarar som har rett og plikt til å delta i introduksjonsprogrammet, har også rett og plikt til å gjennomføre kompetansekartlegging og karriererettleiing, jf. integreringslova §§ 10 og 11. Føremålet er å gi den enkelte eit godt grunnlag for å ta informerte val om arbeid og utdanning, og å sikre at introduksjonsprogrammet blir tilpassa den enkeltes føresetnader og behov.
Kommunen sitt ansvar
Kommunane har ansvar for å planleggje og gjennomføre introduksjonsprogrammet i tråd med lov og forskrift. Dette inneber ansvar for å sørgje for kompetansekartlegging av deltakarane. Kommunen skal registrere opplysningar frå kartlegginga og dele relevante opplysningar med fylkeskommunen. Kompetansekartlegginga skal danne grunnlaget for vidare karriererettleiing.
Kommunen har også ansvar for opplæring i livsmeistring i eit nytt land. Som del av dette skal alle deltakarar få minimum 15 timar opplæring i karrierekompetanse, inkludert kunnskap om utdanningssystemet og arbeidslivet, jf. integreringsforskrifta § 4.
Fylkeskommunen sitt ansvar
Fylkeskommunen har ansvar for sjølve karriererettleiingstilbodet. Dette omfattar å gjennomføre karriererettleiing, samt å registrere og dele relevante opplysningar frå rettleiinga med kommunen. Karriererettleiinga blir gjennomført ved dei fylkeskommunale karrieresentra, i samarbeid med den enkelte flyktningen.
Karriererettleiing i integreringsmottak
Karriererettleiing i integreringsmottak er ikkje lovregulert. Fylkeskommunale karrieresenter kan søkje HK-dir om tilskot til å tilby karriererettleiing i integreringsmottak. Ein føresetnad for å få tilskot er at karrieresenteret har samarbeidsavtale med ein kommune som har etablert integreringsmottak.
I integreringsmottak deltek bebuarane i eit fulltidsprogram der karriererettleiing inngår som ein del av innhaldet. Tilbodet skal bidra til at deltakarane blir best mogleg førebudde på vidare kvalifisering. Vidare busetjing skal skje i ein kommune som best mogleg samsvarer med kvalifiseringsbehova til den enkelte bebuar.